Skuldir heimilanna hækka um 1,3 milljarða vegna vörugjalda

Fyrirhuguð hækkun vörugjalda á tilteknar mat- og drykkjarvörur hefur þau áhrif að verðtryggðar skuldir heimilanna munu hækka um tæplega 1,3 milljarða króna.

Þetta kemur fram á vefsíðu Samtaka atvinnulífsins. Þar segir að samkvæmt frumvarpinu er áætlað að skattahækkunin skili ríkissjóði 800 milljóna kr. viðbótartekjum á ársgrundvelli. Breyttum lögum er ætlað að taka gildi 1. mars 2013.

Samkvæmt frumvarpinu er áætlað að hækkun vörugjaldanna hækki vísitölu neysluverðs um 0,1% á næsta ári. Það mat er byggt á því að árleg einkaneysla landsmanna innanlands nemur um 770 milljörðum króna á verðlagi októbermánaðar þessa árs. 800 milljóna kr. skattahækkun á þessar vörur veldur því 0,1% hækkun á einkaneyslureikningi landsmanna.

Verðtryggðar skuldir heimilanna við Íbúðalánasjóð, banka, lífeyrissjóði og aðrar lánastofnanir námu 1.256 milljörðum kr. í októberlok þessa árs samkvæmt hagtölum Seðlabankans. Þær munu því hækka um 1.256 milljónir króna á næsta ári vegna hækkunar vörugjaldanna.

Skuldir heimilanna hækka því meira á næsta ári en tekjur ríkissjóðs vegna þessarar skattahækkunar.