Frjálsi er sá næstbesti

Frjálsi lífeyrissjóðurinn hefur verið valinn næstbesti lífeyrissjóður smáþjóða af fagtímaritinu Investment Pension Europe (IPE). Besti lífeyrissjóðurinn í flokknum var valinn Hotel Employees Provident Fund á Kýpur.

Undanfarin þrjú ár hefur Frjálsi lífeyrissjóðurinn verið valinn besti lífeyrissjóðurinn á Íslandi af IPE fagtímaritinu. Í fréttatilkynningu frá Arion banka segir að í ár hafi ekki verið veittar viðurkenningar fyrir Ísland sérstaklega heldur keppi sjóðir frá Íslandi nú í flokki smáþjóða, eins og sjóðir annarra Evrópulanda með færri en eina milljón íbúa.

Frjálsi lífeyrissjóðurinn, sem er í rekstri hjá Arion banka, er um 112 milljarðar að stærð og sjóðfélagar eru um 45 þúsund talsins. Sjóðurinn hentar þeim sem hafa frjálst val um í hvaða lífeyrissjóð þeir greiða 12% lágmarksiðgjald og hentar jafnframt þeim sem leggja fyrir í viðbótarlífeyrissparnað.