Enn hækkar áfengið

Ítarlegar skattahækkanir voru kynntar í nýju viðbótarfrumvarpi við fjárlögin á Alþingi í dag. Skattar á tóbak, áfengi, bífreiðar og sykur hækka, bensín hækkar líka. Markmiðið - að ná endum saman hjá ríkissjóði, en líka reyna að hafa áhrif á neyslu almennings.

Katrín Júlíusdóttir, fjármálaráðherra, mælti í dag fyrir furmvarpi um sérstakar aðgerðir í ríkisfjármálum. Viðbætur við fjárlagafrumvarpið, í raun eins konar lokahnykk þess.

VSK á gistingu hækkar úr 7 prósent í 14 prósent. Breytingin á að skilja milljarði á næsta ári, en sátt náðist um að miða hækkunina við 14 prósent frekar en 25,5 prósent.

Þá er lögð til 20 prósent hækkun á tóbaksgjaldi. Og þá verður 100 prósent hækkun á neftóbakinu, íslenska ruddanum svokallaða, sem margir ungir karlmenn taka í vörina.

Skilii sér þetta beint út í verðlag má reikna með að dolla af neftóbaki verði vel á annað þúsund krónur eftir þessar breytingar.

Áfengisgjald hækkar um 4,6 prósent. Þetta skilar sér beint út í verðið á flöskunni í vínbúðunum.

Bankaskatturinn svokallaði, sem er skattur ofan á laun starfsmanna fjármálafyrirtækja og allar skattskyldar þóknanir í bankakerfinu hækkar líka úr 5,45 prósent -6,75 prósent.

Þá verður afnuminn afsláttur sem bílaleigur hafa notið af almennum vörugjöldum bifreiða. Þetta þýðir að það verður dýrara fyrir bílaleigur að endurnýja flotann.

Ráðist er í þessar aðgerðir í staðinn fyrir niðurskurð, en markmiðið er að ná jöfnuði í ríkisfjármálum. Ríkissjóður er mjög skuldsettur og það er dýrt að halda uppi velferðarkerfi.

Í sérstöku frumvarpi um vörugjöld verður skattur á sykruð matvæli hækkaður, en fjármálaráðherra ákvað að láta það líka ná til sætuefna. Þannig að Kókið hækkar, en líka Diet Kókið, sem er með sætuefnum og laust við kaloríur. Og öll önnur matvæli sem innihalda sætuefni, eins og t.d Skyr.is.

Hvers vegna nær þetta líka til sætuefna? Við spurðum Katrínu Júlíusdóttur að því í hádegisfréttum. Hún segir þetta í samræmi við tillögur starfshóps.

Hækkunin er ekki mikil eða 210 krónur á kílóið af hreinum sykri. Vara sem inniheldur 10 prósent viðbætts sykurs ber því 21 krónu hækkun á hvert kíló. Í tilviki sætuefna eru 42 krónur fyrir hvert gramm af viðbættum sætuefnum.