Icelandair og Íslenska auglýsingastofan með nýjan samning

Icelandair og Íslenska auglýsingastofan hafa skrifað undir nýjan samning um áframhaldandi samstarf.

Í tilkynningu segir að fyrirtækin hafi mörg undanfarin ár átt náið og árangursríkt samstarf á sviði markaðsmála sem hefur meðal annars alið af sér fjölda auglýsingaverðlauna og íslensku markaðsverðlaunin fyrir markaðsfyrirtæki ársins og markaðsmann ársins.

Samningurinn tekur til markaðsstarf hér á íslenska markaðinum, en ekki síður til hins umfangsmikla markaðs- og auglýsingastarfs Icelandair á erlendum neytendamörkuðum í Evrópu, Norður-Ameríku og ýmsum fjarlægari löndum.

„Icelandair er eitt öflugasta markaðsfyrirtæki landsins," segir Hjalti Jónsson, framkvæmdastjóri Íslensku í tilkynningunni. „Sterk sýn á markaðsmál, stefnumótun og skýr markmiðasetning hefur gert það að verkum að samstarf okkar við Icelandair hefur verið mjög farsælt og skapandi."

„Árangur Icelandair í krefjandi umhverfi síðust ára hefur verið mjög góður," segir Helgi Már Björgvinsson, framkvæmdastjóri og sölu- og markaðssviðs Icelandair. „Þar hefur öflugt starfsfólk og markvisst markaðsstarf á öllum mörkuðum fyrirtækisins gegnt veigamiklu hlutverki. Stærð, þekking og reynsla Íslensku hefur verið okkur mikilvæg í þeirri sókn og uppbyggingu sem hefur átt sér stað hjá félaginu undanfarin ár."