Lýsing fær á baukinn frá FME

Fjármálaeftirlitið telur að Lýsing hefði átt að svara spurningum sem viðskiptavinur beindi að stofnuninni í stað þess að benda á yfirlýsingu á vefsíðu sinni. Þetta kemur fram í gagnsæistilkynningu vegna athugunar á starfsháttum Lýsingar hf.

Í áliti FME segir að ábending hafi borist frá viðskiptavini Lýsingar hf. um að sér hefði verið neitað um svör við tilteknum fyrirspurnum sem lutu meðal annars að endurútreikningi erlends láns sem viðskiptavinurinn hafði tekið hjá félaginu og geymslureikningi sem félagið hafði stofnað vegna hugsanlegrar ofgreiðslu lánsins.

Í samræmi við verklagsreglur Fjármálaeftirlitsins vegna fyrirspurna og ábendinga óskaði Fjármálaeftirlitið eftir sjónarmiðum Lýsingar hf. vegna málsins. Í svörum Lýsingar hf. kom m.a. fram að félagið teldi fréttatilkynningu sem birt hefði verið á heimasíðu félagsins þann 29. maí sl. fela í sér næg svör við þeim fyrirspurnum sem um ræddi og að því hefði ekki verið talin þörf á sérstökum skýringum. Jafnframt hefðu sumar fyrirspurnirnar verið þess eðlis að ekki væru til einhlít svör við þeim.

Fjármálaeftirlitið féllst ekki á sjónarmið Lýsingar hf. og taldi að efnisleg svör við fyrirspurnum, að teknu eðlilegu tilliti til trúnaðar og hagsmuna fjármálafyrirtækja af leynd yfir tilteknum þáttum starfseminnar, væri nauðsynlegt skilyrði eðlilegra samskipta milli viðskiptavina og fjármálafyrirtækja og þess trausts sem fjármálafyrirtæki verða að njóta hjá viðskiptavinum og almenningi að öðru leyti.

Rétt er að taka fram að í tilkynningu FME kemur fram að á meðan athuguninni stóð, birti Lýsing hf. nýja fréttatilkynningu á heimasíðu sinni sem fól í sér nánari skýringar en finna mátti í fréttatilkynningu félagsins frá 29. maí sl.

Tilkynning FME vegna gagnsæisathugunarinnar.