Hagstofan mælir 4,5% atvinnuleysi í október

Samkvæmt Vinnumarkaðsrannsókn Hagstofu Íslands voru í október s.l. að jafnaði 178.500 manns á vinnumarkaði. Af þeim voru 170.400 starfandi og 8.100 án vinnu og í atvinnuleit. Atvinnuþátttaka mældist 79,5%, hlutfall starfandi 75,9% og atvinnuleysi var 4,5%.

Atvinnuleysi var 2,5 prósentustigum lægra en í október 2011 en þá var atvinnuleysi 7%. Atvinnuleysi í september 2012 var 5,4% á meðal karla miðað við 6,9% í september 2011 og meðal kvenna var það 3,5% miðað við 7,1% í september 2011.

Þetta kemur fram á vefsíðu Hagstofunnar. Þar segir að atvinnulausir teljast þeir sem voru án atvinnu í viðmiðunarviku könnunarinnar, þ.e. höfðu hvorki atvinnu né voru í vinnu (í eina klukkustund eða lengur) sem launþegi eða sjálfstætt starfandi, eru að leita að vinnu og geta hafið störf innan tveggja vikna eða hafa fengið starf sem hefst innan 3 mánaða. Einstaklingar sem eru ekki í vinnu en eru í námi flokkast atvinnulausir ef þeir uppfylla skilyrðin hér að ofan.

Árstíðaleiðréttur fjöldi atvinnulausra í október 2012 var 8.900 eða 4,9% en var 9.900 eða 5,4% í september 2012. Fjöldi starfandi var 171.600 í október 2012 eða 76,7% en var 173.000 eða 77,4% í september 2012.