Gjaldþrotum fyrirtækja fækkaði um 25% milli ára í september

Þá voru 128 fyrirtæki tekin til gjaldþrotaskipta í septembermánuði, flest í byggingarstarfsemi og mannvirkjagerð. Til samanburðar voru gjaldþrotin 172 talsins í sama mánuði í fyrra og fækkaði því um 44 milli ára eða um fjórðung.

Þetta kemur fram á vefsíðu Hagstofunnar. Þar segir að fyrstu 9 mánuði ársins var fjöldi gjaldþrota 789, en það er tæplega 30% fækkun frá sama tíma í fyrra þegar 1.122 fyrirtæki voru tekin til gjaldþrotaskipta. Flest gjaldþrot, það sem af er árinu eru í flokknum byggingarstarfsemi og mannvirkjagerð, 166 talsins.

Í septembermánuði voru skráð 138 ný einkahlutafélög, flest í fjármála- og vátryggingastarfsemi. Til samanburðar voru 150 ný einkahlutafélög skráð í september í fyrra. Fyrstu 9 mánuði ársins var fjöldi nýskráninga 1.330, en það er 6% aukning frá sama tíma í fyrra þegar 1.255 fyrirtæki voru skráð.