Bjartsýnn fyrir Íslands hönd

Norski hagfræðingurinn og fyrrum seðlabankastjórinn Svein Harald Øygard segist bjartsýnn fyrir hönd Íslands og segir mikil tækifæri vera fyrir hendi þegar kemur að því að renna styrkari stoðum undir efnahagslífið.

Svein Harald var starfandi seðlabankastjóri hér á landi árið 2009, frá síðari hluta febrúar mánaðar og fram á haustmánuði sama ár.

Svein Harald var einn þeirra sem vann að skýrslunni um Ísland hjá ráðgjafafyrirtækinu McKinsay en hann hefur starfað þar sem ráðgjafi um árabil, en um tíma starfaði hann einnig sem ráðuneytisstjóri í fjármálaráðuneyti Noregs.

Svein segir Ísland um margt standa á tímamótum og nauðsynlegt sé fyrir fólkið í landinu að ákveða hvert skuli stefnt inn í framtíðina, í efnhagslegu tilliti.

„Ég held að margt hafi verið fært til betri vegar á Íslandi. Við hefðum öll viljað að það hefði gengið hraðar fyrir sig. Nú held ég að aðalþrautin sé að einbeita sér að því hvað verði hægt að gera næst, hvernig hægt sé að skapa nýjan hagvöxt á Íslandi á sjálfbæran hátt. Ég held að þetta sé svarið við spurningunni til langs tíma en það myndi einnig hjálpa okkur að leysa mörg skammtímaverkefni," segir Svein.

Svein Harald segir að huga þurfi sérstaklega að því hvernig megi efla fjárfestingu í hagkerfinu.

„Ef við berum Ísland saman við önnur lönd eftir kreppuna er aðalmunurinn hve lítil fjárfesting á sér nú stað á Íslandi," segir Svein.

Svein Harald segist ennfremur bjartsýnn á efnahagslega framtíð Íslands, hér séu margvísleg tækifæri til þess að gera enn betur.

„Ég held að Ísland hafi það sem til þarf. Íbúarnir eru vinnufúsir, mjög hæfir og áhugasamir og þeir hafa viljann til að gera það sem þarf til að halda fram á við. Svo ég er vongóður. Við vonum öll að það muni ganga hraðar og breytingarnar verði skjótari fyrir Íslendinga," segir Svein.

Leiðrétting: Mishermt var í upphaflegu útgáfu fréttarinnar að Svein Harald hefði verið að störfum í Seðlabanka Íslands í um tvo mánuði. Það er ekki rétt. Hið rétta er að hann starfaði fyrir Seðlabankann í tæpt ár.