Tal ráðherra um ónýta krónu hefur engin áhrif á gengi hennar

Þótt ráðherrar í ríkisstjórn Íslands hafi farið niðrandi orðum um íslensku krónuna undanfarin þrjú ár hafa slík ummæli aldrei haft nein áhrif á gengi hennar til skamms tíma.

Þessir ráðherrar hafa iðulega orðið fyrir harðri gagnrýni fyrir að tala krónuna niður eins og það er orðað. Í úttekt sem greining Arion banka hefur gert og birt er í Markaðspunktum greiningarinnar kemur fram að að ekkert bendi eindregið til þess að ummæli ráðherra um ókosti krónunnar hafi nokkur einhlít áhrif á gengi hennar til skamms tíma.

Greiningin kannaði áhrif ummæla í sex skipti frá árslokum 2010 fram til þessa mánaðar. Í fjórum tilvika birti Bloomberg fréttaveitan ummælin.

Tölfræðileg greining leiðir í ljós að birting ummæla af þessum toga í erlendum fjölmiðlum hefur engin marktæk áhrif á gengisbreytingar krónunnar, það er þegar búið er að leiðrétta fyrir sveiflum sem viðbúið var að yrðu áður en ummælin birtust.

Greiningin segir að þetta eigi ekki að koma á óvart. Í haftaumhverfi ræðst gengi krónunnar að verulegu leyti af framboði og eftirspurn eftir gjaldeyri vegna milliríkjaviðskipta og afborgana af lánum eða fjárfestinga til lengri tíma. Spákaupmenn hafa hins vegar verið svo gott sem klipptir út af markaðnum og geta því ekki átt viðskipti til skamms tíma fyrir verulegar fjárhæðir á grundvelli yfirlýsinga ráðamanna einna saman.

Síðan segir í Markaðspunktunum að þótt ekkert bendi til að yfirlýsingar ráðherranna hafi áhrif til skemmri tíma, er ekki þar með hægt að útiloka að þær grafi undan fjárfestingum í gjaldmiðlinum til lengri tíma.