Launin verði að vera í samræmi við veruleika

Stjórn Lífeyrissjóðs verzlunarmanna ætlar að beita áhrifum sínum innan stjórnar Eimskips til að hófs verði gætt varðandi kjör stjórnenda félagsins. Þetta segir í yfirlýsingu frá stjórninni vegna hlutafjárútboðs sem lauk í dag.

Í yfirlýsingunni segir að í vor hafi lífeyrissjóðurinn tekið ákvörðun um að kaupa 14% hlut í Eimskipafélagi Íslands. Sú ákvörðun hafi tengst fyrirhuguðu hlutafjárútboði til fagfjárfesta og einstaklinga sem stendur nú yfir. Áður átti sjóðurinn óverulegan hlut í Eimskip, um hálft prósent hlutafjár.

Forsvarsmenn Lífeyrissjóðs verslunarmanna segja að sjóðurinn hafi ekki átt aðkomu að þeim ákvörðunum, sem teknar voru á árunum 2010 og 2011, um að veita stjórnendum fyrirtækisins þá kauprétti sem upplýst hefur verið um, enda hafi sjóðurinn þá ekki átt aðild að stjórn fyrirtækisins.

„Ákvörðun sjóðsins um kaup á 14% hlut í Eimskip var tekin að vandlega athuguðu máli þar sem kaupin voru talin tryggja vel hag sjóðfélaga til framtíðar enda er það mat sjóðsins að rekstrarhorfur félagsins séu góðar.

Lífeyrissjóður verzlunarmanna hefur nú afl hlutafjáreignar til að hafa áhrif á skipan stjórnar Eimskips. Stjórn sjóðsins hefur ákveðið að beita áhrifum sínum til að hófs verði gætt varðandi kjör stjórnenda félagsins þannig að þau verði í góðu samræmi við íslenskan veruleika," segir í tilkynningu frá Lífeyrissjóði verzlunarmanna.