Göngur gefa góða von fyrir næsta sumar í Krossá

Þótt flestir stangveiðimenn séu búnir að pakka niður græjunum eftir veiðisumarið eru margir þegar byrjaðir að skoða og skipuleggja það næsta. Á þessum tíma gefst líka tími til að skoða aðrar ár en vanalega.

Á Vesturlandi er að finna margar skemmtilegar ár þar á meðal Krossá á Skarðsströnd í Dalasýslu. Þessi 12,4 kílómetra langa á er með um 40 merktum veiðistöðum en alls veiddust þar 165 laxar á liðnu sumri. Það er vel yfir meðaltalsveiði ár hvert.

Á vefnum Veiða.is er farið yfir veiði sumarsins í Krossá á Skarðsströnd og eru menn almennt sáttir við veiðina þar.

Meðalveiði í Krossá á árunum 1974-2008 var 113 laxar en árin 2008 til 2011 veiddust frá 204 og uppí 346 laxa á sumri. Sumarið í ár hlýtur því að teljast ásættanlegt en aðeins er veitt á tvær stangir. Menn mættu hafa Krossá á Skarðsströnd í huga fyrir næsta sumar því eins og segir á vef Veiða.is:

"Að teknu tilliti til þróunar annarsstaðar á vesturlandi í sumar, þá má Krossá vel við una. Laxagöngur framan af sumri slógu öll met og nú bíða menn spenntir eftir næsta sumri."

Veiðileyfi fyrir sumarið 2013 eru þegar hafin hjá Hreggnasa. Sjá hér