Eigandi Viðskiptablaðsins skilar 14 milljóna hagnaði

Myllusetur ehf., sem á og rekur Viðskiptablaðið og tengda fjölmiðla, hagnaðist um 14 milljónir króna í fyrra. Það er töluvert minna en árið áður en félagið hagnaðist þá um 20,9 milljónir króna. Ástæða samdráttarins er sú að fjármunatekjur drógust saman á síðasta ári, fjármagnsgjöld hækkuðu og félagið greiddi 2,8 milljónir króna í tekjuskatt, en það greiddi engan slíkan árið 2010. Þetta kemur fram í ársreikningi Mylluseturs sem var skilað inn til ársreikningaskrár í síðustu viku. Eigendur Mylluseturs eru Pétur Árni Jónsson, sem á 67 prósent, og Sveinn Biering Jónsson, sem á 33 prósent.

Eignir Mylluseturs eru metnar á 56,8 milljónir króna og jukust um 8,3 milljónir króna á síðasta ári. Þar munar mestu um bifreið sem eignfærð var á árinu. Þorri eigna félagsins er sem áður í útistandandi viðskiptakröfum. Ekki var gerð tillaga um arðgreiðslu vegna síðasta árs og því styrktist eiginfjárstaða félagsins um sem nemur hagnaði þess. Bókfært eigið fé er 17,7 milljónir króna. Skuldir Mylluseturs voru 39,1 milljón króna um síðustu áramót. Þar af voru 22,5 milljónir króna vegna virðisaukaskatts, ógreiddra launa og launatengdra gjalda. - Þsj