Á ekki að "viðgangast í fyrirtæki sem er í almannaeigu"

Sérstaklega gagnrýnt er í skýrslu úttektarnefndarinnar að stjórnendur hafi tekið ákvörðun um að verja fyrirtækið ekki fyrir gengisáhættu, án þess að fyrir þeirri ákvörðun lægi ítarleg greining á mögulegum áhrifum til lengri tíma litið. Með þessu var tekin áhætta, sem að mati nefndarinnar á ekki að viðgangast í fyrirtæki í almannaeigu.

Í skýrslu úttektarnefndarinnar er ítarlega umfjöllun um mikla gengisáhættu Orkuveitu Reykjavíkur, en gengistap, vegna lána sem tekin voru vegna fjárfestinga, er ein af rótum vanda fyrirtækisins.

Skuldir Orkuveitunnar tólffölduðust á átta árum á sama tíma og misbrestur var í áhættustýringu Orkuveitunnar. Það vekur furðu höfunda skýrslunnar að svo virðist sem tekin hafi verið meðvituð ákvörðun um að verja fyrirtækið ekki fyrir gengisáhættu, en í skýrslunni segir: „sérstaka athygli vekur að stjórnendur, sem hluta af skuldastýringu fyrirtækisins, tóku ákvörðun um að verja fyrirtækið ekki fyrir gengisáhættu án þess að fyrir þeirri ákvörðun lægi ítarleg greining á mögulegum áhrifum þessa til lengri tíma litið. Þar með var tekin áhætta, sem að mati úttektarnefndarinnar eigi ekki að viðgangast í fyrirtæki sem er í almannaeigu."