Stærsta skuldabréfaútgáfa einkaaðila frá hruni

Eik fasteignafélag hf. lauk í dag skuldabréfaútgáfu upp á 11,6 milljarða króna. Þetta er stærsta skuldabréfaútgáfa einkaaðila á fjármálamarkaði frá árinu 2008 og er sögð marka vatnaskil á íslenskum fjármagnsmarkaði í tilkynningu frá félaginu.

Yfir þrjátíu fjárfestar tóku þátt í skuldabréfaútboðinu sem Íslandsbanki hf. hélt utanum. Eik fasteignafélag hf. mun nota fjármagnið til að endurfjármagna sig. Með útgáfunni lækkar vaxtakostnaður félagsins umtalsvert og í kjölfarið skapast tækifæri til frekari vaxtar.

Skuldabréfin eru verðtryggð jafngreiðslubréf til 30 ára og bera fasta 4,3% árlega vexti. Safn fasteigna í eigu félagsins er til tryggingar skuldabréfunum.