Yfir 30 fjárfestar tóku þátt í 11,6 milljarða útboði Eikar

Alls tóku yfir 30 fjárfestar þátt í 11,6 milljarða króna skuldabréfaútboði hjá Eik fasteignafélagi sem lauk í gærdag en útboðið var það stærsta hér á landi síðan fyrir hrunið haustið 2008.

Í tilkynningu segir að fjárfestar þessir séu lífeyrissjóðir, tryggingafélög, verðbréfasjóðir og einstaklingar, auk Íslandsbanka. Skuldabréfin eru verðtryggð jafngreiðslubréf til 30 ára og bera fasta 4.3% árlega vexti.

„Skuldabréfaútgáfa Eikar markar ákveðin tímamót í fyrirtækjafjármögnun eftir efnahagshrunið. Útgáfan átti sér nokkurn aðdraganda og var mikil vinna lögð í að útfæra skilmála skuldabréfsins, í nánu samstarfi við fjárfesta," segir Narfi Þ. Snorrason, verkefnastjóri Fyrirtækjaráðgjafar Íslandsbanka.

"Niðurstaðan er góð fyrir báða aðila. Útgáfan mun greiða leið fyrirtækja að fjármagnsmörkuðum og vafalaust munu önnur félög hafa hliðsjón af skilmálum bréfsins þegar kemur að því að sækja fjármagn á markað."

Eik fasteignafélag hf. er leiðandi fasteignafélag á Íslandi og telur eignasafn þess 58 eignir alls að heildarflatarmáli 102.000 fermetrar. Félagið er einn stærsti eigandi leiguhúsnæðis í miðborg Reykjavíkur og eru leigutakar félagsins rúmlega 200 að tölu.