Helmingur svartsýnn á framtíðina

Um helmingur stjórnenda fyrirtækja eru svartsýnir á ástandið framundan. Hlutfall svartsýnna hefur þó minnkað verulega á undanförnum árum. Þetta sýnir Væntingarvísitala Gallup. Vísitalan er mæld á meðal stærstu 400 fyrirtækja landsins.

Greining Íslandsbanka gerir væntingavísitöluna að umfjöllunarefni í dag. Þar kemur fram að þegar síðasta könnun var framkvæmd í maí síðastliðnum töldu 63% þeirra að aðstæður væru slæmar en nú eru 48% á þeirri skoðun. Svartsýnastir eru stjórnendur í sjávarútvegi og byggingariðnaði en í þeim greinum telja engir stjórnendur að aðstæður séu góðar.

Greining Íslandsbanka vekur athygli á því að stjórnendur virðast vera svartsýnni varðandi framtíðina heldur en landinn almennt. Samkvæmt væntingavísitölu Capacent Gallup hefur bjartsýni varðandi framtíðina aukist stöðugt undanfarna mánuði.