Bandaríkjamenn samþykkja kaup Watson á Actavis

Samkeppniseftirlit Bandaríkjanna hefur gefið grænt ljós á kaup lyfjafyrirtækisins Watson á Actavis. Þó eru sett skilyrði fyrir kaupunum.

Í frétt á Reuters segir að skilyrðin séu að hið sameiginlega félag selji réttinn að 18 lyfjategundum til tveggja samkeppnisaðila sinna, það er Sandoz og Par Pharmaceuticals.

Kaupin, sem nema 5,9 milljörðum dollara, voru samþykkt af hálfu Evrópusambandsins fyrr í mánuðinum.

Meðal þeirra lyfja sem Watson þar að selja réttinn á eru tóbaksvarnalyfið Zyban og blóðþrýstingslyfið Cardizem.

Í tilkynningu frá Watson segir að endanlega verði gengið frá kaupunum á Actavis í lok þessa mánaðar.