Ný löndunaraðstaða í notkun í Sundahöfn

Faxaflóahafnir hafa tekið í notkun löndunaraðstöðu á Skarfabakka í Sundahöfn. Aðstaðan er á afgirtu og malbikuðu svæði fremst á hafnarbakkanum. Aðstaða til að geyma frystigáma er góð og tenglar fyrir rafmagn eru fyrir hendi. Sérstakt skýli er á svæðinu sem notast til að flokka og skoða afurðirnar sem koma á land af togurum og uppsjávarfiskiskipum.

Fjallað er um málið á vefsíðu Faxaflóahafna. Þar segir að aðstaðan á Skarfabakka er þriðja löndunaraðstaðan í Sundahöfn en fyrir er löndunarstöð á Vogabakka og Kleppsbakka en þær stöðvar tengjast frystigeymslum Samskips og Eimskips.

Með aukinni löndun uppsjávarafla í Reykjavík, einkum makríl, er löndunarstöðin á Skarfabakka góð viðbót á álagstímum en stöðin er einnig hugsuð fyrir erlend skip þegar Matvælastofnun hefur viðurkennt stöðina sem landamærastöð.

Það var togarinn Brimnes RE 27, í eigu Brims hf., sem formlega vígði aðstöðuna á Skarfabakka í gær. Togarinn landaði um það bil 570 tonnum af frosnum afurðum, grálúðu, karfa og blálöngu, allt unnin vara og pökkuð í umbúðir til útflutnings.