Skaðabótamál á hendur Landsbankamönnum tekið fyrir

Skaðabótamál slitastjórnar Landsbankans, gegn fyrrum stjórnendum bankans, Halldóri J. Kristjánssyni og Sigurjóni Þ. Árnasyni, verður tekið fyrir í Héraðsdómi Reykjavíkur í dag. Auk þeirra tveggja er Sigríði Elínu Sigfúsdóttur, fyrrum framkvæmdastjóra fyrirtækjasviðs bankans, einnig stefnt í öðru málinu af tveimur sem tekin eru fyrir í dag.

Auk þessara fyrrnefndu stefnir slitastjórnin vátryggingarfélögum sem gáfu út ábyrgðartryggingar fyrir stjórnarmenn og stjórnendur bankans. Þetta eru alls 32 aðilar, þar af fjölmargir starfsmenn Lloyd's tryggingarfélagsins í Lundúnum og Brit Insurance, Allianz, Liberty Mutual, QBE og fleiri.

Halldór og Sigurjón eru krafðir um tæplega 30 milljarða króna í þessum málum, vegna brota í starfi og gáleysis, sem leiddi til tjóns fyrir kröfuhafa Landsbankans að mati slitastjórnarinnar.