Hagstofan mælir 5% atvinnuleysi

Atvinnuleysi var 5% í september. Atvinnuleysi var því einu prósentustigi lægra en í september í fyrra en þá var atvinnuleysi 6%.

Þetta kemur fram í vinnumarkaðsrannsókn Hagstofu Íslands. Þar segir að í september s.l. voru að jafnaði 180.700 manns á vinnumarkaði. Af þeim voru 171.700 starfandi og 9.000 án vinnu og í atvinnuleit. Atvinnuþátttaka mældist 80,6%, hlutfall starfandi 76,6%.

Atvinnuleysi í september s.l. var 4,3% á meðal karla miðað við 5,5% í september í fyrra og meðal kvenna var það 5,7% miðað við 6,4% í september í fyrra.

Á vefsíðu Hagstofunnar segir að atvinnulausir teljast þeir sem voru án atvinnu í viðmiðunarviku könnunarinnar, þ.e. höfðu hvorki atvinnu né voru í vinnu (í eina klukkustund eða lengur) sem launþegi eða sjálfstætt starfandi, eru að leita að vinnu og geta hafið störf innan tveggja vikna eða hafa fengið starf sem hefst innan 3 mánaða.

Einstaklingar sem eru ekki í vinnu en eru í námi flokkast atvinnulausir ef þeir uppfylla skilyrðin hér að ofan.