Tugmilljónir sparast vegna fækkunar ráðherra

Sparnaður í launakostnaði ráðherra í tíð þessarar ríkisstjórnar nemur rúmlega 41 milljón króna. Sparnaðurinn er tilkominn vegna fækkunar ráðherra úr tólf í átta. Þetta kemur fram í svari forsætisráðherra við fyrirspurn Vigdísar Hauksdóttur, þingmanns Framsóknarflokks.

Vigdís spurði hver heildarkostnaður við ráðherraskipti í tíð þessarar ríkisstjórnar væri, þ.m.t. launakostnaður, biðlaun og eftirlaunaréttur.

Í svarinu kemur fram að enginn launakostnaður annar en biðlaun myndist við ráðherraskipti. Á tímabilinu voru biðlaun vegna ráðherraskiptanna 9.137.724 kr. og launatengd gjöld 2.079.715 kr. En á móti því kemur svo sparnaður í launakostnaði um 41.560.497 kr. vegna fækkunarinnar. Ekki verður séð að ráðherraskiptunum fylgi beinn aukinn kostnaður fyrir ríkið vegna eftirlaunaréttar.

Árlegur sparnaður í launakostnaði vegna fækkunar ráðherranna mun framvegis nema 27.706.998 kr. miðað við núverandi launakjör ráðherra.