Allt samkvæmt áætlun í Ásgarðslandi

Oddviti Grímsness- og Grafningshrepps segir ekki rétt að snurða hafa hlaupið á þráðinn varðandi sölu á Ásgarðslandinu. Lax-á muni hafa eignast veiðiréttinn í Soginu í síðasta lagi um áramót.

Á Veiðivísi í gær kom fram að Grímsness- og Grafningshreppur er enn skráður eigandi Ásgarðslandsins þrátt fyrir að sveitarstjórnin hafi samþykkt fyrir hálfu ári að ganga að hæsta tilboðinu af sjö í veiðirétt og veiðihús þar. Sagt var að salan væri ekki gengin í gegn.

"Sá sem átti hæsta tilboðið og gengið var til samninga hefur staðið við allt sitt," segir Gunnar Þorgeirsson oddviti. Kaupsamningur sé því löngu frágenginn.

Eins og sagði á Veiðivísi í gær nam hæsta tilboðið 181 milljónum króna. Hlutur sveitarfélagsins í söluverðinu er 126,7 miljónir króna á móti einkahlutafélaginu Búgarði. Helmingur söluverðsins hefur þegar verið greiddur. Seinni helminginn átti að greiða fjórum mánuðum síðar.

Að sögn Gunnars er kaupandinn fyrirtækið Lax-á. "Það gengur allt eftir samkvæmt því tilboði sem lá fyrir. Það á eftir að borga seinni greiðsluna samkvæmt samningi og þá verður gefið út afsal og eigninni þinglýst á eigandann," segir hann.

Nokkrar tafir hafa þó orðið á framgangi málsins. "Þetta tók bara aðeins lengri tíma í lóðamálum og skipulagsvinnu en við reiknuðum með í upphafi en þetta er í fullu samráði við Árna Baldusson í Lax-a. Málið klárast innan örfárra vikna og í allra síðasta lagi fyrir áramót. Það er engin snurða á þessum þræði," segir Gunnar.

Þegar Lax-á hefur tekið við veiðiréttindinum í Soginu fyrir Ásgarðslandi og veiðihúsinu þar er komin upp sú staða að fyrirtækið verður orðið leigusali eins helsta keppinautar síns í veiðileyfasölu, Stangaveiðifélags Reykjavíkur, sem er með leigusamning um ánna út næsta sumar.