Nýta orkuna um helmingi betur

Reykjanesbær og Carbon Recycling International (CRI) skrifuðu í gær undir samstarfssamning um þróun og uppbyggingu umhverfisvæns græns efnavinnslugarðs í Helguvík. Með sérstakri útfærslu er hægt að nýta orkuna allt að helmingi betur og minnka mengun umtalsvert miðað við það sem almennt tíðkast í sömu starfsemi.

Hugmyndafræðin byggist á því að samnýta orkuna milli samtengdra fyrirtækja og nýta útblástur og úrgang eins fyrirtækis sem innflæði í næsta fyrirtæki. Í garðinum eru þrjár grunneiningar þ.e. álversklasi, eldsneytis- og efnavinnsluklasi og kísilmálmklasi. Fyrirtækin spara hvert öðru umtalsverða orku.

Saman munu bærinn og fyrirtækið vinna að því að skapa tugi eða hundruð beinna og afleiddra starfa við byggingu verksmiðjanna, við framleiðslu þeirra og í tengdri starfsemi.