Árni Oddur og Theo Hoen hringdu inn markaðinn í New York

Theo Hoen, forstjóri og Árni Oddur Þórðarson, stjórnarformaður Marel, opnuðu NASDAQ markaðinn á MarketSite, Times Square í New York í dag við hátíðlega athöfn, en Marel fagnar 20 ára skráningarafmæli sínu á árinu.

Marel var skráð í Kauphöllina 29. júní 1992. Páll Harðarson, forstjóri NASDAQ OMX Iceland, var gestgjafi við athöfnina og bauð forstjóra, stjórnarformann og aðra fulltrúa Marel ásamt gestum þeirra velkomna.

Árni Oddur Þórðarson, stjórnarformaður Marel, segist í tilkynningu stoltur af framgangi Marels á þeim tíma sem fyrirtækið hefur verið skráð á markað. "Ég er mjög stoltur af þeim árangri sem Marel hefur náð frá skráningu félagsins á markað fyrir 20 árum. Marel hefur vaxið í alþjóðlegan leiðtoga í spennandi atvinnugrein með um 4.000 starfsmenn og starfsemi í um 40 löndum. Það hefur skipt sköpum í uppbyggingu Marel að hafa skýra stefnu og aðgang að fjármagni á hlutabréfamarkaði."

Theo Heon, forstóri, tekur í sama streng og segir Marel hafa lagt upp með að fylgja skýrri sýn "Skýr framtíðarsýn, nýsköpun og sókn á nýja markaði. Á þetta hefur Marel lengi lagt áherslu og það hefur skilað félaginu í fremstu röð. Við þökkum starfsfólki okkar dugnað og hugvitssemi og viðskiptavinum farsælt samstarf. Þá þökkum við hluthöfum dyggan stuðning og kauphöllinni góð samskipti á liðnum árum."

Páll Harðarson, forstjóri NASDAQ OMX Iceland, sagði Marel vera skýrt dæmi um hvernig skráning á markað geti hjálpað fyrirtækjum að vaxa og dafna. "Við óskum Marel hjartanlega til hamingju með þennan áfanga. Marel hefur sýnt fram á hvaða þýðingu það getur haft fyrir reksturinn að vera skráð fyrirtæki. Frumkvöðlakraftur og skýr framtíðarsýn hafa einkennt þetta öfluga fyrirtæki. Við erum hæstánægð með að Marel skuli fagna þessum áfanga hér í höfuðstöðvum NASDAQ í New York og hlökkum til að fylgjast með fyrirtækinu í framtíðinni."

Marel er í hópi stærstu útflutningsfyrirtækja Íslands og er í fararbroddi á heimsvísu í þróun og framleiðslu á háþróuðum búnaði og kerfum til vinnslu á fiski, kjöti og kjúklingi. Fyrirtækið starfrækir skrifstofur og dótturfyrirtæki í meira en 30 löndum, auk 100 umboðsmanna og dreifingaraðila.