Már: Mjög mikilvægt að endursemja um skuldir Landsbankans

„Þrátt fyrir ýmsa atburði á alþjóðlegum vettvangi er sú mynd sem þar [Fjármálastöðugleikaritinu sem kom út vor innsk. blm] var dregin upp í meginatriðum óbreytt. Áhætta fjármálakerfisins hefur minnkað samfara efnahagsbata, framgangi endurskipulagningar skulda heimila og fyrirtækja, sterkri eiginfjárstöðu fjármálafyrirtækja og minna misvægi í efnahagsreikningum þeirra," segir Már Guðmundsson, seðlabankastjóri, í inngangsorðum nýs Fjármálastöðugleika, rits seðlabankans um fjármálastöðugleika.

Í ritinu er fjallað vítt og breitt um stöðu efnahagsmála hér á landi, með sérstakri áherslu á fjármálastöðugleika. Meiri stöðugleiki er sagður ríkja í efnahagsmálum, heldur en áður, m.a. vegna sterkari stöðu fjármálakerfisins, en óvissuþættir eru þó enn miklir. Ekki síst eru það háir gjalddagar á erlendum skuldum þjóðarbússins, bæði fyrirtækja og hins opinbera, í framtíðinni, sem geti haft áhrif á fjármálastöðugleika.

Sérstaklega eru það skuldir Landsbankans, vegna skuldabréfs á milli gamla og nýja Landsbankans, en greiðslubyrði vegna þess verður mikil framtíðinni miðað við óbreyttar forsendur.

„Að óbreyttu munu áætlaðar afborganir af erlendum lánum annarra en ríkissjóðs

aukast verulega á árinu 2015 og verða að meðaltali 134 ma.kr. ári 2015-2018 eða um 8% af landsframleiðslu. Í þessu sambandi munar mestu um afborganir nýja Landsbankans til þess gamla sem verða um 69 ma.kr. að meðaltali á ári á þessu tímabili eða 4% af landsframleiðslu. Ef ekki kemur annaðhvort til endursamninga um þessar skuldir eða að viðkomandi aðilar öðlast aðgang að erlendum lánamörkuðum til að endurfjármagna þær gæti þrýstingur á gengi krónunnar og gjaldeyrisforða Seðlabankans orðið verulegur, sem myndi gera losun fjármagnshafta erfiðari en ella. Því er mjög mikilvægt að endursamið verði um skuld nýja Landsbankans við þann gamla," segir Már í inngangsorðum.

Sjá má nýtt fjármálastöðugleikarit Seðlabankans hér.