Slitastjórnir tóku út 262 milljarða í gjaldeyri úr Seðlabankanum

Slitastjórnir gömlu bankanna þriggja tóku út samtals tæplega 262 milljarða króna af gjaldeyrisreikningum sínum í Seðlabankanum í síðasta mánuði. Við þetta minnkað heildargjaldeyrisforði bankans niður í tæplega 533 milljarða króna.

Þetta kemur fram á vefsíðu Seðlabankans. Þar segir að þessi úttekt hafi ekki haft áhrif á hreinan eða nettó gjaldeyrisforða bankans. Einnig segir að samkvæmt lögum geti fjármálafyrirtæki í slitameðferð tekið út innistæður sínar hvenær sem er en þessar innistæður teljast til gjaldeyrisforðans meðan þær eru inni á reikningum í Seðlabankanum og eru þar flokkaðar sem erlendar skammtímaskuldir.

Á vefsíðu bankans segir að frá því í október 2008 hafa fjármálafyrirtæki í slitameðferð lagt inn erlendan gjaldeyri á reikninga í Seðlabanka Íslands vegna endurheimta fjármuna. Hefur sá erlendi gjaldeyrir aukið vergan gjaldeyrisforða. Innstæðurnar hafa verið flokkaðar sem erlend skammtímaskuld og því ekki haft áhrif á hreinan gjaldeyrisforða.

Erlendur gjaldeyrir sem lagður hefur verið inn á reikning í Seðlabankanum með þessum hætti hefur síðan verið ávaxtaður hjá öruggustu stofnunum sem völ er á, þ.e. Alþjóðagreiðslubankanum í Basel og hjá öðrum seðlabönkum.

Fjármálafyrirtæki í slitameðferð geta tekið út gjaldeyrisinnstæður sínar í samræmi við ákvæði laga, hvenær sem er. Áhrif úttektanna eru þau að vergur gjaldeyrisforði Seðlabankans lækkar sem þeim úttektum nemur en hreinn gjaldeyrisforði (forði umfram skammtímaskuldir) Seðlabanka Íslands verður óbreyttur.