Moody´s: ÍLS áfram á neikvæðum horfum

Matsfyrirtækið Moody's heldur lánshæfiseinkunn Íbúðalánasjóðs (ÍLS) óbreyttri í Baa3 og með neikvæðum horfum.

Þetta kemur fram í nýju áliti frá Moody´s sem birt hefur verið á vefsíðu Kauphallarinnar. Í álitinu kemur m.a. fram að horfurnar séu neikvæðar vegna þess að rekstur sjóðsins hefur gengið illa undanfarið ár og að enn sé eiginfjárhlutfall hans undir 5%.

Moody´s segir að lánshæfiseinkunn Íbúðalánasjóðs sé óbreytt og hin sama og hjá ríkissjóði Íslands þar sem reiknað er með því að ríkisvaldið muni hlaupa undir bagga með sjóðnum ef staða hans haldi áfram að versna.

Þá kemur fram hjá Moody´s að ef lánshæfiseinkunn ríkissjóðs hækkar að nýju muni slíkt ekki sjálfvirkt leiða til þess að einkunn ÍLS hækki einnig.