Farþegum Icelandair fjölgaði um 18% milli ára í september

Icelandair flutti 198 þúsund farþega í millilandaflugi í september og voru þeir 18% fleiri en í september á síðasta ári. Sætanýting nam 81,0% samanborið við 78,0% í september 2011. Farþegum fjölgaði mest á N-Atlantshafsmarkaðinum.

Þetta kemur fram í tilkynningu til Kauphallarinnar. Þar segir einnig að farþegar í innanlands- og Grænlandsflugi voru rúmlega 28 þúsund í september sem er lækkun um 5% á milli ára. Sætanýting nam 70,0% og jókst um 4,1 prósentustig á milli ára.

Seldum blokktímum í leiguflugi fækkaði um 5% m.v. september á síðasta ári, þar sem fraktvélar í leiguflugsverkefnum voru einni færri en í fyrra. Fraktflutningar jukust um 14% á milli ára.

Framboð á gistinóttum hjá hótelum félagsins jókst um 24% frá september á síðasta ári. Herbergjanýting var 76,5% og var 4,1 prósentustigum lakari en í september 2011.