HB Grandi fær umhverfisverðlaun á Akranesi

Skipulags- og umhverfisnefnd Akraness hefur ákveðið að veita HB Granda umhverfisverðlaun Akraneskaupstaðar 2012 fyrir fallegustu fyrirtækjalóðina í sveitarfélaginu.

Frá þessu er greint á heimasíðu Akraneskaupstaðar en umhverfisverðlaunin eru veitt árlega fyrir fallegustu einkalóðina, fyrirtækja- eða stofnanalóðina, fallegustu götumyndina og eins fyrir besta framtak íbúa- og félagssamtaka.

Vilhjálmur Vilhjálmsson, forstjóri HB Granda segir á vefsíðu félagsins að þessi viðurkenning sé starfsfólki HB Granda á Akranesi til mikils sóma og hvatning fyrir félagið og starfsfólk þess.