Íbúðalánasjóður veitir brátt óverðtryggð lán

Enn er stefnt á það að Íbúðalánasjóður byrji að veita óverðtryggð húsnæðislán fyrir lok ársins, en undirbúningur vegna þessa hefur staðið yfir undanfarna mánuði. Íbúðalánasjóður hefur til þessa eingöngu veitt verðtryggð lán.

Undanfarna mánuði hefur Íbúðalánasjóður unnið að því að hefja veitingu á nýrri tegund lána, það er óverðtryggðra lána, en sjóðurinn hefur alla tíð eingöngu veitt verðtryggð lán.

Sigurður Erlingsson, forstjóri Íbúðalánasjóðs, segir að undirbúningur vegna fyrrgreindra áforma sé langt kominn.

„Undirbúningur hefur gengið vel og er langt kominn, en við höfum verið að vinna með eftirlitsstofnunum að því sem þarf að klára áður en hægt er að ýta lánunum og fjármögnun formlega af stað," segir Sigurður.

Í nýju fjármálastöðugleikariti Seðlabanka Íslands, sem kynnt var í síðust viku, kemur fram að 86 prósent nýrra íbúðalána á þessu ári hafi verið óverðtryggð lán, sem þýðir að nær öll ný íbúðalán eru veitt hjá viðskiptbönkunum en einungis lítill hluti hjá Íbúðalánasjóði.

Sigurður segist vonast til þessa að allri vinnu verði lokið fyrir áramóti, og að þá standi viðskiptavinum Íbúðalánasjóðs til boða að taka óverðtryggð lán, þar sem höfuðstóll hækkar ekki með verðbólgu.

„Við erum að horfa til þess að ljúka vinnunni fyrir áramót," sagði Sigurður í morgun.