Hreiðar Már: Braut engin lög - greinargerð í heild sinni

Hreiðar Már Sigurðsson, fyrrverandi forstjóri Kaupþings, hafnar því alfarið að hafa brotið lög í hinu svokallaða Al-Thani máli, og rökstyður það í ítarlegri greinargerð sem lögð hefur verið fram í málinu.

Eins og fram kom í Fréttablaðinu í morgun furðar hann sig á því í greinargerðinni að sérstakur saksóknari hafi ekki ákært tiltekna undirmenn hans fyrir löglaust uppgjör á þrettán milljarða sjálfsábyrgð sjeiks Al Thani.

Slitastjórn Kaupþings telur ábyrgðina ógreidda og hefur stefnt sjeiknum til að greiða hana.

Hreiðar Már telur undirmenn sína hafa framið refsivert lögbrot 8. október 2008, sama dag og Kaupþing féll. Þá var sjeik Mohammed bin Khalifa Al Thani leyft að gera upp 12,8 milljarða króna sjálfskuldarábyrgð vegna kaupa sinna í bankanum með því að skipta 50 milljón dollurum í krónur á langtum hærra gengi en öðrum bauðst. Dollarana hafði hann fengið að láni frá Kaupþingi.

Ákæran í málinu byggir á því að ákærðu, sem eru auk Hreiðars Más þeir Ólafur Ólafsson, fyrrverandi stór hluthafi í bankanum fyrir hrun, Sigurður Einarsson, fyrrverandi stjórnarformaður Kaupþings, og Magnús Guðmundsson, fyrrverandi forstjóri Kaupþings í Lúxemborg, hafi beitt blekkingum og staðið að markaðsmisnotkun, í tengslum við kaup Sjeiks Mohammed Al-Thani frá Katar á fimm prósenta hlut í Kaupþingi, í september 2008.

Greinargerð Hreiðars Más er í 216 liðum á 44 síðum, og er hún birt hér á Vísi í heild sinni. Þar er fjallað ítarlega um málið út frá sjónarhóli Hreiðars Más.