Spáir aukinni verðbólgu á næstunni

Greiningardeild Arion banka spáir 0,7% hækkun á vísitölu neysluverðs í september. Þar með eykst ársverðbólgan úr 4,1% og í 4,2% en verðbólgan hjaðnaði myndarlega í síðasta mánuði.

Fjallað er um málið í Markaðspunktum greiningarinnar. Þar segir að sömuleiðis fari verðbólguhorfur fyrir næstu mánuði versnandi og spurning hvort sú lága verðbólga sem mælst hefur undanfarna mánuði, þ.e. verðhjöðnun þrjá mánuði af fjórum, hafi verið slembilukka eða sé til vitnis um bættan árangur í baráttunni við verðbólgu.

„Frá því um miðjan ágúst hefur krónan veikst um ríflega 5%. Þrátt fyrir umtalsverða veikingu á einum mánuði er þó ekki búið að þurrka út alla þá styrkingu sem hafði átt sér stað nær samfellt frá því í mars (tæplega 12% styrking)," segir í Markaðspunktunum.

„Samhliða svo mikilli veikingu hafa verðbólguhorfur þó versnað að okkar mati eins og e.t.v. kemur glögglega í ljós þegar skammtímaspáin okkar er skoðuð en gangi sú spá eftir er útlit fyrir að ársverðbólgan verði komin í 4,5% í árslok."