Sigurður ráðinn framkvæmdastjóri Athygli

Sigurður Sverrisson hefur verið ráðinn framkvæmdastjóri Athygli ehf. en hann gerðist hluthafi í fyrirtækinu fyrir skömmu. Hann tekur við starfinu af Valþóri Hlöðverssyni sem verður nú stjórnarformaður fyrirtækisins.

Í tilkynningu segir að Sigurður Sverrisson hafi lengst af starfað við fjölmiðla og í ráðgjöf um almannatengsl. Eftir samfellt starf í fréttamennsku frá 1978 starfaði Sigurður sem almannatengslaráðgjafi hjá m.a. Athygli, PjeErr og KOM á árunum 1998-2007. Árið 2008 lauk hann MSc gráðu í almannatengslum frá University of Stirling í Skotlandi og var eftir það upplýsinga- og kynningarfulltrúi LÍÚ uns hann hóf aftur störf hjá Athygli um síðustu áramót.

Almannatengslafyrirtækið Athygli ehf. var stofnað 15. mars 1989. Þar starfa nú 10 manns. Athygli er með höfuðstöðvar að Suðurlandsbraut 30 í Reykjavík en rekur einnig starfsstöð að Hafnarstræti 82 á Akureyri.