Á undanþágu í bruggnámi

Nýi bjórinn frá Kalda kemur í verslanir næstkomandi mánudag. Bjórinn nefnist Október Kaldi og er bruggaður eftir nýrri uppskrift sem 21 árs gamall sonur brugghússeigendanna þróaði.

Sigurður Bragi Ólafsson verður líklega seint talinn til reynslubolta í bruggheiminum en hann er enn svo ungur að hann þurfti sérstaka undanþágu til að komast í bruggnám til Bandaríkjanna sem hann leggur nú stund á. Þrátt fyrir ungan aldur hefur Sigurður engu að síður verið viðloðandi bruggiðnina lengi, en foreldrar hans stofnuðu bruggverksmiðjuna Kalda árið 2005. Síðustu þrjú ár hefur hann verið fastur starfsmaður brugghússins.

Október Kaldi er fyrsta bjóruppskriftin sem að hann þróar sjálfur. Sigurður virðist eiga framtíðina fyrir sér í bruggun því skemmst er frá því að segja að uppskriftin hlaut fyrstu verðlaun á hinni árlegu bjórkeppni að Hólum í Hjaltadal í byrjun mánaðarins og verður nú grundvöllurinn að nýjasta bjórnum frá Kalda og mun eflaust rata á eldhúsborð margra.

Heilsíðuviðtal var við Sigurð í Viðskiptablaðinu í dag. Þar segir hann m.a. frá starfseminni hjá Kalda og bjórnáminu sem hann leggur nú stund á. Námið er bæði bóklegt og verklegt og hefur Sigurður að mestu leyti lokið við bóklega námið. Verklega námið er hins vegar allt eftir og Sigurður mun seinka því um sinn þar sem hann á von á sínu fyrsta barni í janúar.

Eftir námið verður Sigurður kominn með diplómu í bruggi og mun snúa sér að bjórgerð hjá verksmiðju foreldra sinna. Þar mun hann vinna í samstarfi við reynda bruggara. „Ég verð alls ekkert aðalbruggari Kalda. Við munum bara hjálpast öll að," segir hann.

Eins og stendur er unnið að gerð jólabjórsins hjá Kalda. Þar er ekki unnið eftir uppskrift frá Sigurði en hann leggur sitt að mörkum til að allt gangi upp og bjórinn bragðist sem best.