Össur: Evran á bjartari tíð framundan

„Ég er þeirrar skoðunar að nú horfi töluvert betur fyrir framtíð evrunnar en áður," sagði Össur Skarphéðinsson, utanríkisráðherra, á Alþingi í dag. Vigdís Hauksdóttir, þingmaður Framsóknarflokks, velti því upp hvort ekki væri kominn tími til að draga aðildarumsóknina til baka.

„Er ekki kominn fullkominn forsendubrestur fyrir því að halda áfram með þessa umsókn? Er ekki rétt að staldra við?" spurði spurði Vigdís. En Össur var ekki beinlínis á þeim buxunum.

„Það er allsendis ótímabært að stöðva eða draga umsóknina til baka," sagði Össur. Hann sagði að um þessar mundir væru leiðtogar Evrópuríkja í fyrsta sinn að manna sig upp í að koma Evrunni aftur á kjöl. Össur benti aukinheldur á að í skýrslu Seðlabanka Íslands hefði komið fram að Evran væri álitlegasti kostur Íslendinga ef á annað borð ætti að taka upp erlendan gjaldmiðil hér á landi.

„Ef við hættum við umsóknina er verið að svipta Íslendinga þeim möguleika að taka upp Evruna til framtíðar," sagði Össur.

Vigdís óttast hins vegar að Evrópusambandið sé smám saman að verða að sambandsríki í stíl við Bandaríkin. Hún benti á fyrirætlanir innan ESB um að taka upp sameiginlegt utanríkisráðuneyti og einn utanríkisráðherra og einnig vangaveltur um að stofna samevrópskan her.