Óska eftir heimild til sölu á hlutum ríkisins í bönkunum

Fjármálaráðherra fær heimild til að selja allan hlut íslenska ríkisins í Arion banka og Íslandsbanka, auk þess sem honum verður heimilt að selja ríflega 11% hlut í Landsbankanum, samkvæmt nýju frumvarpi sem dreift var á Alþingi í morgun. Frumvarpið gerir auk þess ráð fyrir að ráðherra fái heimild til þess að selja hluti ríkisins í sparisjóðunum. Frumvarpið var áður lagt fram á síðasta kjörtímabili en var ekki afgreitt.

Í greinargerð með frumvarpinu kemur fram að um sé að ræða eignarhluti ríkisins í viðskiptabönkunum Arion banka hf., Íslandsbanka hf. og Landsbankanum hf. Lagt er til að heimildin nái til sölu allra eignarhluta ríkisins í Arion banka hf. (13%) og Íslandsbanka hf. (5%) og allra eignarhluta í Landsbankanum hf. umfram 70% hlut ríkisins af heildarhlutafé hans.

Þá er einnig lögð til heimild til sölu á eignarhlutum ríkisins í sparisjóðum. Ríkið á nú 90,9% stofnfjárhluti í Sparisjóði Bolungarvíkur, 49,5% í Sparisjóði Norðfjarðar, 90% í Sparisjóði Svarfdæla, 55,3% í Sparisjóði Vestmannaeyja og 75,9% í Sparisjóði Þórshafnar.