Salan á Hamleys rædd á kröfuhafafundi í nóvember

Kröfuhafafundur slitastjórnar Landsbanka Íslands verður haldinn 22. nóvember næstkomandi. Ekki hefur verið ákveðið hvenær skilanefndin hyggst greiða út til kröfuhafa.

Í samtali við Vísi sagði Páll Benediktsson, upplýsingafulltrúi slitastjórnar Landsbankans, að farið verði yfir öll helstu mál á fundinum. Þar á meðal verður rætt um stöðu þrotabúsins eftir að leikfangaverslunin Hamleys, sem áður var í eigu Baugs, var seld franska félaginu Groupe Ludendo í vikunni.

Í tilkynningu frá slitastjórninni frá því fyrr í vikunni kemur fram að salan hafi verið í fullu samræmi við þau markmið um að hámarka virði eignarhlutans í félaginu og skila bestu mögulegu endurheimtum til kröfuhafa.

Farið verður yfir nýjustu fjárhagsupplýsingar á fundinum að sögn Páls en einnig verður spurningum kröfuhafa svarað. Þá verður einnig farið yfir riftunarkröfur.