"Skýrslan lítur svolítið út eins og pantað plagg"

Skýrsla Seðlabankans um valkosti Íslands í gjaldmiðils- og gengismálum sem kom út í vikunni var upphaflega skrifuð til að fjalla um íslensku krónuna eða evruna sem valkosti fyrir Ísland. Þetta kom fram í umræðum í útvarpsþættinum Sprengisandi á Bylgjunni í dag.

„Svo hún litast svolítið af þessum efnistökum," sagði Lilja Mósesdóttir, en niðurstaða skýrslunnar var að Ísland hefði í raun aðeins tvo raunhæfa kosti í gjaldmiðilsmálum, þ.e. að taka upp evru eða halda sig við krónuna.

„Þessi skýrsla lítur svolítið út sem pantað plagg," sagði Unnur Brá Konráðsdóttir, þingmaður Sjálfstæðisflokksins. Hún telur af ýmsum ástæðum að evran sé ekki raunhæfur kostur í næstu framtíð. Það vekur athygli Unnar að skautað sé fram hjá Bandaríkjadollarnum sem möguleika fyrir Ísland. „Það þarf eiginlega að skoða það betur af hverju er skautað fram hjá þessum valkosti."

Lilja Mósesdóttir gerði athugasemdir við mælikvarðann sem mikið er stuðst við í skýrslunni þegar evran er metin sem kostur. Sá mælikvarði er að Ísland hafi mest viðskipti við Evrópusambandið. Lilja hefði viljað styðjast meira við tengsl hagsveifla landanna sem rannsökuð voru. Hagsveiflur Íslands og Evrópusambandsins eru mjög ólíkar. Hins vegar eru hagsveiflur Íslands og annarra Norðurlanda líkari og því telur Lilja að heillavænlegt gæti verið að horfa til þeirra gjaldmiðla. „Þetta hefur ekki verið kannað nægilega mikið," segir hún.

Upptaka af umræðunum er á hlekknum hér að ofan.