Sunnlendingar óánægðir með skattahækkunina

Markaðsstofa Suðurlands hvetur stjórnvöld til að hverfa frá boðaðri hækkun virðisaukaskatts á gistingu. Hækkun virðisaukaskatts þykir til þess fallin að grafa undan viðleitni Sunnlendinga til að laða ferðamenn að landsfjórðungnum.

Á síðustu árum hefur verið unnið að því að lengja ferðamannatíma á árinu. „Í því skyni höfum við kynnt ýmis tækifæri í ferðaþjónustu. Viðtökur hafa verið góðar en það leynist engum sem til þekkir að lítið má út af bregða ef kvikur markaður á borð við neytendur ferðaþjónustu á ekki að leita annað," segir í tilkynningu frá Markaðsstofu Suðurlands.

Hækkun virðisaukaskattsins þykir stofna þessari áætlun í voða. Hún mælist hvarvetna illa fyrir í fjórðungnum þar sem fyrirtækin óttast um afkomu sína. Markaðsstofa Suðurlands hvetur stjórnvöld frekar til að leggjast á árarnar með fyrirtækjum í ferðaþjónustu en hækka virðisaukaskattinn. „Með því móti eru fyrirtækin mun líklegri til að skila til samfélagsins þeim tekjum sem kallað er eftir."