Gríðarlegir hagsmunir í þjónustu vegna olíuleitar

Haukur Óskarsson, framkvæmdastjóri iðnaðar hjá Mannviti, segir að gríðarlegir hagsmunir séu í húfi fyrir sveitarfélög á Austurlandi vegna olíuleitar á Drekasvæðinu. Frá þessu er greint í fréttaritinu Austurglugganum.

Sveitarfélögin takast nú á um hvar þjónustumiðstöð vegna olíuleitarinnar mun rísa og samkeppnin eykst stöðugt. Þjónustan sem sveitarfélögin geta veitt vegna olíuleitarinnar getur verið mikil og því eru miklir hagsmunir í húfi. Haukur telur að verkefnið geti orðið stærra en tilkoma ALCOA Fjarðaráls til Austurlands. Því getur skipt miklu fyrir landsfjórðunginn að fá að veita þjónustuna. Haukur bendir á að ef þjónusta sveitarfélaga við rannsóknarboranirnar uppfyllir öll skilyrði sé ekki ólíklegt að frekari þjónusta geti komið í kjölfarið þegar olíuframleiðsla hefst fyrir alvöru, þ.e. ef allt gengur upp.

Vegna þessa hafa sveitarfélögin Fjarðabyggð og Fljótsdalshérað ákveðið að kynna sig sem eitt atvinnusvæði til að auka aðdráttarafl svæðisins.