Töluverður kippur á fasteignamarkaðinum

Töluverð fjölgun varð á þinglýstum kaupsamningum um fasteignir á höfuðborgarsvæðinu í síðustu viku miðað við vikuna þar á undan. Alls var þinglýst 113 samningum í síðustu viku en þeir voru 95 talsins í vikunnar þar á undan.

Þetta kemur fram á vefsíðu Þjóðskrár Íslands. Fjöldi samninga í síðustu viku er þar að auki nokkuð yfir meðallaginu undanfarna þrjá mánuði sem er 101 samningur á viku.

Af þessum 113 samningum voru 86 um eignir í fjölbýli, 19 samningar um sérbýli og 8 samningar um annars konar eignir en íbúðarhúsnæði.

Heildarveltan var tæplega 3,3 milljarðar króna og meðalupphæð á samning 29,1 milljón króna. Til samanburðar var veltan tæplega 2,9 milljarða króna að meðaltali á viku undanfarna þrjá mánuði og meðalupphæðin 28,8 milljónir kr.