Aflaverðmætið jókst um 10 milljarða milli ára

Aflaverðmæti íslenskra skipa nam 80,5 milljörðum króna á fyrri hluta ársins 2012 samanborið við 70,5 milljarða kr. á sama tímabili 2011. Aflaverðmæti hefur því aukist um 10 milljarða kr. eða 14,2% á milli ára.

Þetta kemur fram á vefsíðu Hagstofunnar. Þar segir að aflaverðmæti botnfisks var 52,2 milljarðar kr. og jókst um 8% frá sama tíma í fyrra þegar aflaverðmætið nam 48,4 milljörðum kr.

Verðmæti þorskafla var um 27,2 milljarðar og jókst um 12,9% frá fyrra ári. Aflaverðmæti ýsu nam 7,4 milljörðum og jókst um 19,4% en verðmæti karfaaflans nam 7,7 milljörðum, sem er 21,4% aukning frá fyrstu sex mánuðum ársins 2011. Verðmæti ufsaaflans jókst um 6,1% milli ára og nam 4,1 milljarði króna í janúar til júní 2012.

Verðmæti uppsjávarafla nam um 18,5 milljörðum króna í janúar til júní 2012, sem er 37,6% aukning frá fyrra ári. Sú aukning skýrist að mestu af loðnuafla að verðmæti rúmum13 milljörðum króna samanborið við 8,7 milljarða á fyrri hluta ársins 2011. Einnig var 1,6 milljarða króna aukning í kolmunnaafla, sem nam um 2,5 milljörðum króna árið 2012. Aflaverðmæti flatfisksafla nam um 6,3 milljörðum króna, sem er 9,1% aukning frá janúar til júní 2011.

Verðmæti afla sem seldur er í beinni sölu útgerða til vinnslu innanlands nam 41,4 milljörðum króna og jókst um 21,9% miðað við fyrstu sex mánuði ársins 2011. Verðmæti afla sem keyptur er á markaði til vinnslu innanlands jókst um 15,3% milli ára og nam12,2 milljörðum króna.

Aflaverðmæti sjófrystingar nam tæpum 23,3 milljörðum í janúar til júní og jókst um 5,1% milli ára en verðmæti afla sem fluttur er út óunninn nam rúmum 3,1 milljörðum króna, sem er 1,7% samdráttur frá árinu 2011.