Íslenskir lífeyrissjóðir í hópi þeirra bestu

Lífeyrissjóðir í Danmörku, Hollandi, Ástralíu og á Íslandi skila að meðaltali mestri ávöxtun samkvæmt nýrri skýrslu Efnahags- og framfarastofnunarinnar. Greint var frá skýrslunni á vef stofnunarinnar í gær. Þar kemur fram að í fyrra skiluðu sjóðir í Danmörku að meðaltali 12,1% ávöxtun en á Íslandi skiluðu sjóðirnir 2,3% ávöxtun.

Sjóðir á Spáni, í Bandaríkjunum, Ítalíu og Japan voru með neikvæða ávöxtun á bilinu 2,2 til 3,6 prósent. Raunávöxtun sjóða í sjö ríkjum, þar á meðal Finnlandi, Grikklandi, Austurríki og Póllandi var neikvæð um 4%.

Eignir lífeyrissjóða í ríkjum innan Efnahags- og framfarastofnunarinnar námu að meðaltali um 72,4% í lok desember á siðasta ári, en þær voru um 67,3% árið 2001. Mestar eru eignirnar í Hollandi, eða um 138% af vergri landsframleiðslu, 128,7% á Íslandi, 92,8% í Ástralíu og 88,2% í Bretlandi.