Steingrímur J.: Greiðslur úr takti "við íslenskan veruleika“

Launakostnaður slitstjórnar Glitnis er úr öllum tengslum við íslenskan veruleika, segir Steingrímur J. Sigfússon atvinnuvegaráðherra. Hann segir þó mikilvægt fyrir fólk að átta sig á því að kostnaður íslenska ríkisins vegna þessa sé enginn.

Lífeyrissjóðirnir Gildi og Lífeyrissjóður verzlunarmanna fengu síðastliðinn föstudag ítarlegar upplýsingar um launakostnað slitstjórnar- og skilanefndarmanna þrotabús Glitnis. Eins og greint var frá í fréttum Stöðvar 2 í gær, er megn óánægja hjá stjórnum sjóðanna með hversu háar greiðslur hafa farið úr þrotabúinu til slitastjórnar- og skilanefndarmanna, þar sér í lagi lögmannanna Páls Eiríkssonar og Steinunnar Guðbjartsdóttur, sem sitja í slitastjórn bankans. Frá árinu 2009 hafa þau fengið greiðslur upp á samtals ríflega 850 milljónir króna úr þrotabúinu, þegar greiðslur vegna fulltrúa sem starfa fyrir þau eru meðtaldar.

Skilanefndarmennirnir Árni Tómasson og Heimir Haraldsson, sem hættu störfum um síðustu áramót, fengu samtals um 252 milljónir króna vegna starfa sinna.

Tímakaup formanns slitastjórnar, Steinunnar, samkvæmt gögnunum sem lífeyrissjóðirnir fengu afhent á föstudag og fréttastofa hefur undir höndum, er 35 þúsund og fimm hundruð krónur. Páll er með aðeins lægra tímakaup, eða 29 þúsund og fimm hundruð krónur á tímann, í útseldri vinnu.

Steingrímur J. Sigfússon, atvinnuvegaráðherra, sagði að loknum ríkisstjórnarfundi í morgun að hann skildi vel að íslenskir kröfuhafar væru óánægðir með þennan háa kostnað. „Þessar greiðslur eru algjörlega úr takti við íslenskan veruleika, og það er vel skiljanlegt að íslenskir kröfuhafar séu óánægðir með þær, þó erlendir kröfuhafar hafi hugsanlega einhverjar aðrar hugmyndir um hvað sé eðlilegt."

Steingrímur segir að fólk verði þó að hafa það í huga að ekki sé króna að fara úr ríkissjóði vegna þessa kostnaðar. Það séu einungis kröfuhafar sem greiði kostnaðinn, og að slitastjórnirnar séu dómsskipaðar. „Það er mikilvægt að hafa það í huga að ríkissjóður ber ekki kostnað af þessum greiðslum, heldur einungis kröfuhafar. Stjórnvöld hafa ekki nein úrræði á hendi til þess að grípa inn í, þegar að þessu kemur," sagði Steingrímur að loknum fundi í morgun.