Nýfjárfesting nemur 58,6 milljörðum á þremur árum

Nýfjárfesting nemur samtals 58,6 milljörðum kr. frá árinu 2009. Í október það ár var nýfjárfesting leyfð sem fyrsta skrefið í losun gjaldeyrishafta. Síðan hafa alls verið skráðar 509 nýfjárfestingar fyrir samtals fyrrgreinda upphæð.

Þetta kemur fram á vefsíðu Seðlabankans. Þar segir að af þeirri fjárhæð hafa 154 nýfjárfestingar verið losaðar að fullu, fyrir jafnvirði 18,1 milljarð króna í erlendum gjaldeyri og 32 nýfjárfestingar verið losaðar að hluta fyrir jafnvirði 6,6 milljarða í erlendum gjaldeyri.

Alls hefur verið samþykkt losun á 193 nýfjárfestingum í heild eða hluta fyrir samtals 24,7 milljarða króna. Rétt er að benda á að hver fjárfestir getur haldið á fleiri en einni nýfjárfestingu.