Komu með tvo milljarða gegnum fjárfestingaleiðina

Bakkavararbræðurnir Ágúst og Lýður Guðmundssynir nýttu sér fjárfestingaleið Seðlabankans, sem gefur fjárfestum kost á að kaupa krónur með um 20% afslætti, tvisvar í sumar.

Síðast kom félag undir þeirra stjórn með 463 milljónir króna til landsins í júlí en í maí hafði annað félag í þeirra eigu gefið út skuldabréf fyrir 1,5 milljarða króna eftir að hafa nýtt sér fjárfestingaleiðina.

Þetta kemur fram í umfjöllun sem birtist í Morgunblaðinu í dag. Félög í eigu bræðrana hafa því komið með tæpa tvo milljarða til landsins í gegnum fjárfestingaleið Seðlabankans.

Í umfjöllun Morgunblaðsins kemur fram að um 55 milljarðar hafi nú komið til landsins í gegnum fjárfestingaleið Seðlabankans. Það þykir í raun aðeins dropi í hafið til að takast á við aflandskrónuvandann.

Ekki eru allir sammála um gildi fjárfestingaleiðarinnar og þeir sem eru andvígir henni segja að hún skekki samkeppnisstöðu á markaði. Nú séu í raun tveir hópar á íslenskum markaði að bítast um sömu tækifærin. Annars vegar þeir sem fengu afslátt og hins vegar þeir sem fengu ekki afslátt.

Einnig telja sumir að leiðin gagnist helst þeim sem hefðu hvort eð er fjárfest hér á landi, þ.e. yfirleitt fjársterkir Íslendingar sem eiga fjármuni erlendis.