Lánið var í erlendum myntum

Hæstiréttur staðfesti í dag niðurstöðu héraðsdóms um að lán sem Hótel Stykkishólmur tók hjá Arion banka væri í raun lán í erlendum myntum en ekki gengistryggt lán í íslenskum krónum. Því var ekki um ólögmæta gengistryggingu að ræða og var lánið löglegt í alla staði.

Upphæðin í lánasamningi var tilgreind sem svissneskir frankar og japönsk jen. Hvergi var fjárhæð skuldarinnar tilgreind í íslenskum krónum. Í tryggingabréfi sem gefið var út vegna lántökunnar eru upphæðirnar einnig tilgreindar í erlendu gjaldmiðlunum. Hins vegar kemur fram í yfirskrift tryggingarbréfsins að lánið sé í íslenskum krónum bundið vísitölu neysluverðs, en það var ekki talið skipta máli enda þótti yfirskriftin ekki koma heim og saman við efni bréfsins að öðru leyti.

Vegna þessa var niðurstaðan sú að lánið væri lögmætt lán í erlendum myntum og Hótel Stykkishólmi var gert að greiða eftirstöðvar þess.