Ólafur Ísleifs: Allt á huldu um verðmyndun á gjaldeyrismarkaði

Verðbólga er aftur farin að þokast upp á við eftir að hafa lækkað hratt á sumarmánuðum. Verð á fatnaði hækkaði mikið milli mánaða, en verðbólgan mælist nú fjögur komma þrjú prósent. Ólafur Ísleifsson lektor í hagfræði segir ómögulegt að spá um gengi krónunnar.

Í sumar styrkist krónan nokkuð, samhliða háannatíma ferðaþjónustunnar, en sú styrking hefur öll gengið til baka nú. Fyrir hverja evru fást nú 160 krónur í sumar var hægt á ríflega 140 krónur þegar krónan var sterkust.

Samkvæmt Hagstofu Íslands hækkar verðbólga nú frá fyrri mánuði, meðal annars vegna verðhækkana á fatnaði og fleirum þáttum sem næmir eru fyrir gengi krónunnar.

Ólafur Ísleifsson, lektor í hagfræði við Háskólann í Reykjavík, segir að verðbólgan sé einkum næm fyrir breytingum á eldsneytisverði og húsnæðisverði. Þegar að kemur að gengi krónunnar sé óvissan mikil.

„Þar erum við [Íslendingar] þannig settir, að við búum við algjöralega ógagnsæjan gjaldeyrismarkað. Að svo miklu leyti sem Seðlabankinn ræður markaðnum ekki einn, þá eru það náttúrulega bankarnir, þar af tveir í eigu erlendra vogunarsjóða. Þannig að það er allt á huldu um verðmyndun á þessum markaði," segir Ólafur.