Harpa fær MICE verðlaunin

Harpa hefur unnið til hinna árlegu MICE ( Meetings, Incentives, Conferences, Exhibitions) verðlauna sem besta ráðstefnuhús í norður-Evrópu samkvæmt tilkynningu frá Hörpu.

Hin virtu MICE verðlaun eru veitt sem viðurkenning fyrir framúrskarandi sérstöðu í ráðstefnu-, hvata- og viðskiptaferðageiranum. Kosningar um MICE verðlaunin eiga sér stað á netinu og meðal þeirra sem kjósa eru ráðstefnuskipuleggjendur og meðlimir MICE. Verðlaunahafarnir fá sérstaka umfjöllun í tímaritinu MICE report.

„Það er okkur mikil ánægja að tilkynna að Harpa hefur verið valið af lesendum okkar sem besta ráðstefnuhús í Norður-Evrópu," ritar Charles Vandeleur, ritstjóri MICE report af þessu tilefni. „ Erfitt er að vinna til verðlauna í þessum flokki en þar bar Harpa af vegna stórkostlegrar staðsetningar, framúrskarandi aðstöðu og þjónustustigs bæði fyrir viðskiptavini og gesti hússins."

„Þetta er mjög mikil viðurkenning," segir Karitas Kjartansdóttir ráðstefnustjóri Hörpu. „ Þetta staðfestir hve Harpa er gott ráðstefnuhús og gefur okkur ástæðu til að horfa björtum augum til framtíðar. Það er greinilegt að við erum nú þegar vel kynnt á erlenda ráðstefnu og fundarmarkaðnum."