Dágott gengi hjá lokahollinu í Þverá

Síðasta hollið í Þverá þetta haustið veiddi mun betur en hollin á undan og náði ellefu löxum á land auk nokkurra sjóbirtinga.

Að sögn veiðimanns úr lokahollinu voru sumir laxanna vel yfir 70 sentímetra mörkunum og því sleppt. Var sá lengsti í kringum 90 sentímetrar. Þá settu menn mun í fleiri laxa sem ekki náðist að landa. Steinahylur var sá staður sem gaf langbest.

Sem fyrr segir veiddust einnig nokkrir sjóbirtingar. Sá stærsti var glæsilegur, rúmlega 70 sentímetra hængur sem vóg átta og hálft pund.

Kuldi og rok var það sem veðurguðirnir buðu lokahollinu upp á og er árangurinn þeim mun ánægjulegri. Á lokavaktinni á mánudagsmorgun veiddist reyndar ekki neitt enda var þá norðan hvassviðri, eins stigs hiti og snjófjúk. Þess utan var áin lituð ofan til, að því er talið var vegna moldroks uppi á heiðum. Það skal þó tekið fram að mannskapurinn gaf sig að sjálfsögðu ekki og reyndu hvað þeir gátu þar til yfir lauk.

gar@frettabladid.is